নষ্ট অকবিৰ নষ্ট অকবিতা :
"হালধীয়া চোলা পিন্ধা কবি"
=================

হালধীয়া চোলা পিন্ধা কবিৰ হৃদয় হালধীয়া

সিহঁতে সেউজীয়া পাতৰ পোচাক পৰিধান কৰা
কবিৰ দৰে
লিখিব নোৱাৰে
মাটিৰ বুকুত নাঙলৰ কলমৰে ভালপোৱাৰ কবিতা

হালধীয়া চোলা পিন্ধা কবিয়ে কবিতা লিখে
হালধীয়া সৰাপাতৰ বেটুপাত থকা দামী পত্ৰিকাত

হালধীয়া চোলা পিন্ধা কবিয়ে দোতৰা চিনি নাপায়
সিহঁত টোপনি যায় ভায়লীনত আঙুলি বুলাই
হালধীয়া সপোন এটা
বুকুত মেৰিয়াই

আথানিকোঁৱৰ - জলকুঁৱৰী আৰু বিৰিণাকুঁৱৰীৰ সাধুকথা এটাই
ওৰে ৰাতি উচুপে
তামস নদীৰ তামসাবৃত্ত পাৰঘাটত

হালধীয়া চোলা পিন্ধা কবিয়ে বৰষুণ আহিলে
হালধীয়া ছাতি মেলি দিয়ে

সেউজীয়া পাতৰ পোচাক পৰিধান কৰা কবিয়ে
ৰ'দে-বৰষুণে পথাৰত লিখে অসমাপ্ত পাণ্ডুলিপি

বিঃদ্ৰঃ
হালধীয়া চোলা পিন্ধা কবিয়ে হালধীয়া চোলা পিন্ধিলে
সকলোকে হালধীয়া দেখে !

ණ কন্দৰ্পজিৎ কল্লোল